Kryeministri Edi Rama, me anë të një postimi në Facebook, ka paralajmëruar të gjithë zaptuesit se pas miratimit të ligjit të ri do të ndëshkohen me burg.
Sipas kryeministrit, me ligjin aktual zaptuesit dhe shkelësit nuk pësojnë asgjë, por me hyrjen e të riut në fuqi, gjërat nuk do të jenë si më parë, por do të ndryshojnë rrënjësisht.
“Mijëra metra katrorë rërë në Kune të Lezhës, u çliruan sot nga zaptuesit. Me legjislacionin aktual zaptuesit e plazheve nuk pësojnë asgjë, ndërsa me ligjin e ri për vijën bregdetare, duhet të ndëshkohen me heqje lirie”, shkruan Rama në postimin e tij.
Kujtojmë se dy ditë më parë, kryeministri Edi Rama deklaroi se në vjeshtë do të dërgojë një ligj në kuvend, përmes të cilit do të kërkojë heqjen e kompetencave të administrimit të pushtetit vendor në lidhje me vijën bregdetare.
Kjo nismë, sipas tij, ka për qëllim zhdukjen e abuzimeve dhe administrimin më të mirë të hapësirave bregdetare.
