Një vrasës me pagesë dhe dy bashkëpunëtorë dyshohet se janë autorët e vrasjes së 53-vjeçarit Fatbardh Lici në Shkodër, ditë më parë. Policia dhe Prokuroria ngrenë dyshime se në krim janë përfshirë tre persona, autori dhe dy bashkëpunëtorët e tij.
I dyshuari i parë është personi që njoftoi autorin se Fatbardh Lici do të ishte në kafene. I dyshuari i dytë si bashkëpunëtor, është personi që e priti autorin pas krimit, ku edhe dogji makinën tip “Benz”, e cila dyshohet se ishte vjedhur në Tiranë. Mendohet se autori të jetë vrasës me pagesë.
Deri më tani pista kryesore e vrasjes së 53-vjeçarit Fatbardh Lici është ajo e gjakmarrjes nga Kurtmemajt.
Vrasje mafioze
Lici ishte duke pirë kafe në një lokal në lagjen “Kiras” në Shkodër. Dyshohet se dy persona janë afruar pranë këtij lokali mëngjesin e së premtes, njëri prej tyre ka dalë nga një makinë “Mercedez Benz” dhe ka qëlluar me breshëri kallashnikovi në drejtim të Fatbardh Licit.
Më shumë se 10 gëzhoja janë gjetur në vendin e ngjarjes, ndërkohë që dy autorët pas atentatit, janë larguar dhe kanë djegur makinën në fshatin Dobraç. Në momentin e vrasjes, në tavolinë nuk ka pasur persona të tjerë me Fatbardh Licin. Autori sipas dëshmitarëve, ka vepruar me gjakftohtësi dhe nuk ka qenë i maskuar.
Policia e ka të vështirë identifikimin e tij, pasi në zonë nuk ka patur kamera sigurie. Duket se atentatorët ishin të mirëinformuar për lëvizjet e 53-vjeçarit, i cili çdo ditë pinte kafen në të njëjtin lokal. Tek makina e djegur dhe arma, ekspertët shpresojnë të gjejnë gjurmë gishtash, që mund të çojnë në identifikimin e atentatorëve.
Pista e hakmarrjes
Pista kryesore e hetimeve deri më tani është hakmarrja. Kjo pasi Fatbardh Lici është një emër i njohur për policinë. Lici dyshohet se në vitin 2011 ka qenë i përfshirë në vrasjen e Astrit Kurmemajt, i dënuar me 25 vite burg për disa vrasje.
Ai u vra në hyrje të Rrogozhinës, gjatë periudhës që mori 3 ditë leje nga burgu i Shën Kollit, ku vuante dënimin, dhe teksa kthehej për në institucionin e vuajtjes së dënimit. Ndonëse u shoqërua në komisariat, Fatbardh Lici u la i lirë, pasi nuk u gjetën prova se ai kishte vrarë Astrit Kurtmemajn.
