Sipas “Daily NK”, një azhornuesi të zhvillimeve më të fundit në Korenë e Veriut, që operon nga Koreja e Jugut, Kim Jong-un i është nënshtruar një operacioni kardiovaskular më datën 12 Prill të këtij viti.
Nga ana tjetër, një zyrtar amerikan ka deklaruar se aktualisht po punohet për të zbardhur aludimin se “lideri i Koresë së Veriut ndodhet me një këmbë në varr, pas operacionit të zhvilluar”.
Zyrtari u prononcua për “CNN” teksa theksoi se bashkë me ekipin e tij, është duke u përpjekur të zbulojë se si është gjendja shëndetësore e Jong-un.
Mirëpo të gjithë e dimë se kjo nuk është aspak e lehtë!
Duke qenë se vendi është nën regjimin e diktaturës, e vërteta shpesh shtrembërohet, derisa shndërrohet në një informacion të gënjeshtërt.
I shtojmë kësaj edhe faktin se rutina dhe shëndeti i liderit verikorean mbahen të fshehta, deri në sekret… dhe ai që guxon që të flasë rreth këtyre dy faktorëve është i kërcënuar me jetë.
Për të mos folur pastaj për mbrojtjen e jetës së tij.
Mjafton të rikujtojmë vitin 2018-të, kur makina e Kim Jong-un shoqërohej nga shumë truproja që vraponin.
Ajo periudhë ishte historike, pasi Kim Jong-un u bë lideri i parë i Koresë së Veriut që shkeli në Korenë e Jugut, duke kaluar vijën ushtarake që ka ndarë gadishullin që prej fundit të Luftës Koreane, në vitin 1953.
Takimi historik gozhdoi qytetarët e dy vendeve para ekranit ndërsa dy liderët shtrënguan duart në kufi.
Pasi udhëheqësit përfunduan bisedimet në ndërtesën e Shtëpisë së Paqes për mënyrën se si të vendosin paqen në Gadishullin Korean, Kim u kthye në Veri me limuzinën e blinduar “Mercedes” dhe truprojat e shoqëronin duke vrapuar.
Ky zakon i padëgjuar më herët habiti të gjithë botën dhe mediat.
Kim Jong Un is back for the afternoon portion of the #interkoreansummit, and so are his bodyguards running alongside his limousine pic.twitter.com/w9VJPdn6su
— Josh Berlinger (@joshberlinger) April 27, 2018
Andrei Lankov, një profesor në Universitetin Kookmin, në Korenë e Jugut, pohon se shumë pak njerëz dinë detaje rreth jetës së liderit Kim dhe ata nuk guxojnë t’i shpërndajnë me të tjerët pasi, preferojnë më shumë që të jenë gjallë.
Ekspertët dhe analistët që studiojnë Korenë e Veriut bazohen shumicën e rasteve tek imazhet satelitore, në pamundësi për të marrë informacione tjetërkund.
Le të rikthehemi edhe njëherë tek gjendja shëndetësore e Jong-un.
Si qëndron e vërteta?
A është ai realisht me “një këmbë në varr”?
Epo, për këtë informacion duhet të tregohemi të duruar dhe të presim edhe pak, ndërkohë le të mjaftohemi me informacionet e cituara nga mediat ndërkombëtare.
