Japonia do të dëbojë tetë diplomatë dhe zyrtarë rusë për shkak të luftës në Ukrainë, tha zëdhënësi i Ministrisë së Jashtme Hikariko Ono, në një konferencë për shtyp të premten.
Diplomatët janë nga Ambasada Ruse në Japoni dhe zyrtarë nga Zyra e Përfaqësuesit Tregtar.
“Mohimi i Rusisë për vrasjet masive të civilëve, duke e quajtur atë lajm të rremë nga Ukraina, është pjesë e propagandës së Rusisë dhe është kategorikisht e papranueshme”, tha zëdhënësi.
Më herët, ministri japonez i Ekonomisë, Tregtisë dhe Industrisë njoftoi se vendi do të reduktojë gradualisht importet e qymyrit rus, në përgjigje të pushtimit të Ukrainës nga Moska.
Njoftimi i Japonisë vjen pasi udhëheqësit evropianë planifikojnë të heqin gradualisht importet e qymyrit rus, në përgjigje të skenave tronditëse në Bucha, një periferi e Kievit.
Burimi i lajmit: CNN. Përshtatur nga Tirana Today
