Shtetet e Bashkuara “kurrë, kurrë, kurrë” nuk do ta njohin përpjekjen e Rusisë për të aneksuar territorin në Ukrainë, tha presidenti Joe Biden. Ai po fliste përpara një fjalimi të premten nga Vladimir Putin, i cili do të deklarojë se katër rajone të okupuara të Ukrainës do t’i bashkohen Rusisë.
Kremlini thotë se Luhansk, Donetsk, Zaporizhzhia dhe Kherson mbështetën aneksimin në referendumet pesë-ditore. Të ashtuquajturat vota janë dënuar gjerësisht jashtë Rusisë si një mashtrim.
SHBA do të vendosë sanksione të reja ndaj Rusisë si rezultat i aneksimit. “Shtetet e Bashkuara, dua të jem shumë i qartë për këtë, kurrë, kurrë, kurrë nuk do t’i njohin pretendimet e Rusisë mbi territorin sovran të Ukrainës,” tha z.Biden.
Të enjten, presidenti rus nënshkroi dy dekrete që njohin Zaporizhzhia dhe Kherson si territore të pavarura, duke hapur rrugën për aneksimin e tyre.
Dokumentet, të shpërndara në mediat shtetërore ruse, thonë se pavarësia e dy rajoneve po njihet në përputhje me të drejtën ndërkombëtare dhe “të sanksionuar në Kartën e Kombeve të Bashkuara”.
Megjithatë, Sekretari i Përgjithshëm i OKB-së António Guterres ka thënë se çdo aneksim i territorit të një vendi bazuar në përdorimin e forcës shkel Kartën e OKB-së dhe ligjin ndërkombëtar. Është një “përshkallëzim i rrezikshëm” që “nuk ka vend në botën moderne”, tha ai.
Presidenti ukrainas Volodymyr Zelensky do të vendosë se si të përgjigjet në një takim urgjent të këshillit të tij të sigurisë kombëtare dhe mbrojtjes të premten. Sekretari i këshillit Oleksiy Danilov tha se do të merren “vendime të rëndësishme, themelore për vendin tonë”, por nuk dha detaje.
Asnjë nga katër rajonet e pushtuara që Rusia synon të inkorporojë nuk është nën kontrollin e saj të plotë. Ajo mund të pretendojë vetëm për 60% të Donetsk, ndërsa kryeqyteti rajonal i Zaporizhzhia mbetet në duart e Ukrainës.
Ndërsa ukrainasit nxituan për të nxjerrë të afërmit e tyre nga zonat e pushtuara të rajonit të Zaporizhzhia, raketat goditën një kolonë civile me makina në periferi të qytetit kryesor. Guvernatori ukrainas tha se 23 civilë ishin vrarë dhe 28 të tjerë u plagosën në sulmin rus. Dy kolona makinash u goditën dhe trupat e dy grave shiheshin në tokë.
Në një telefonatë me z. Putin, presidenti i Turqisë Rexhep Tajip Erdogan shprehu kundërshtimin e tij ndaj aneksimit të planifikuar. Ai i bëri thirrje liderit rus që të ulë tensionin dhe t’i japë negociatave të paqes me Ukrainën një tjetër shans, sipas një zëdhënësi.
Turqia, së bashku me OKB-në, ka ndërmjetësuar në negociatat midis Rusisë dhe Ukrainës në të kaluarën – me sukses në arritjen e një marrëveshje për të rifilluar eksportet e grurit përmes Detit të Zi.
Burimi i lajmit: BBC. Përshtatur nga Tirana Today
