Rikthehet në fokus dosja e çështjes ‘Hajdari’. U mbajt sot seanca e parë e procesit të rigjykimit të Izet Haxhiajt, i dënuar në mungesë me 25 vite burg për vrasjen e ish-deputetit Azem Hajdari.
Izet Haxhia i cili ka qenë truproja i parë i Sali Berishës, asokohe president i Shqipërisë, e fitoi këtë të drejtë rigjykimi nga drejtësia shqiptare, pas 17 vitesh në mungesë.
Avokati Idajet Beqiri, këtë seancë ka kërkuar ndryshimin e masës së sigurisë për ish-truprojën e Berishës nga ajo e arrestit me burg në masë më të butë.
Beqiri kërkoi lirimin e të pandehurit, që asnjëherë nuk i ka pranuar akuzat, me argumentin se Haxhiaj ka kryer 13 vite paraburgim që nga koha kur është arrestuar në Turqi, të cilat konvertohen në 20 vite burgim.
Seanca e ditës së sotme u shty me kërkesë të prokurorit Dritan Nushi për t’u njohur me aktet e dosjes ‘Hajdari’ ndërsa seanca e radhës është lënë të mbahet më 5 korrik ora 12:00.
Familjarët e Azem Hajdarit nuk ishin të pranishëm në seancë teksa gjykata u shpreh se nuk dihet nëse ata janë në dijeni apo jo për zhvillimin e kësaj seance.
