Një 37-vjeçar është vënë në pranga nga policia e Elbasanit pasi iu gjet një sasi prej 7 kilogramësh drogë e llojit kanabis sativa.
Artur Gjolena, me banim në Tiranë u arrestua në flagrancë teksa lëvizte me automjetin e tij, në aksin Peqin-Elbasan, ku transportonte edhe drogën. Ndërsa është proceduar penalisht në gjendje të lirë, një shtetase 45 vjeçe me banim në Laç.
Njoftimi i Policisë: Operacioni nga Sektori për Hetimin e Narkotikëve në DVP Elbasan. Arrestohet në flagrancë poseduesi i lëndës narkotike.
Si dhe procedohet penalisht në gjendje të lirë një shtetase (pasagjere), për mos kallëzim krimi. Sekuestrohet 7 kg lëndë narkotike Cannabis Sativa në formë çokollate.
Në vijim të punës për parandalimin, evidentimin dhe goditjen e veprimtarisë kriminale në fushën e narkotikëve, si dhe bazuar në informacionet e marra në rrugë operative, Specialistët për Hetimin e Narkotikëve në Drejtorinë Vendore të Policisë Elbasan, kanë zhvilluar dhe finalizuar operacionin policor të koduar “Bradasheshi”.
Në kuadër të këtij operacioni u arrestua në flagrancë shtetasi:
- Artur Gjolena, 37 vjeç, banues në Tiranë.
Si dhe u procedua penalisht në gjendje të lirë për “Mos kallëzim krimi”, shtetasja: (pasagjere në mjetin ku u gjet lënda narkotike)
- V.K., 45 vjeçe, banuese në Laç.
Specialistët për Hetimin e Narkotikëve kishin marrë informacion se në aksin rrugor Peqin-Elbasan, ky shtetas po transportonte një sasi lëndë narkotike për ta shitur, ku gjatë kontrollit të ushtruar në mjetin e tij me targa TR 3692 J, shërbimet e policisë gjetën dhe sekuestruan në cilësinë e provës materiale, 7 kilogramë lëndë narkotike Cannabis Sativa në formë çokollate.
Materialet i kaluan Prokurorisë pranë Gjykates së Shkallës së Parë Elbasan, për veprat penale “Prodhimi dhe shitja e lëndëve narkotike”, ” Drejtimi i automjeteve në mënyrë të parregullt” të parashikuar nga nenet 283, 291 të Kodit Penal në ngarkim të shtetasit Artur Gjolena, dhe për veprën penale “Moskallëzimi i Krimit” të parashikuar nga neni 300 i Kodit Penal në ngarkim të shtetases V.K.
