Lëvizja Vetëvendosje nuk ka të ndalur me kundërshtitë e saj ndaj qeverisë Hoti, ndërsa do të nisin peticionin për shkarkimin e kësaj qeverie. Rexhep Selimi, shef i grupit parlamentar të LVV, ka bërë të ditur se sot kanë filluar mbledhjen e nënshkrimeve për mocion ndaj qeverisë “Hoti”. Ai iu bëri thirrje partive politike opozitare, që ta mbështesin këtë mocion.
“Nga sot, grupi parlamentar i LVV nis mbledhjen e nënshkrimeve për procedimin e mocionit ndaj qeverisë. Në këtë rast i ftojmë të gjitha grupet e tjera parlamentare, që ta mbështesin këtë mocion.
Ne ua kemi dërguar edhe shkresat me njoftim dhe thirrje që ta mbështesin këtë mocion grupet parlamentare të caktuara”.
Nënkryetarja e Kuvendit, Arbërie Ngavci, ka thënë se kjo është një qeveri jolegjitime, e cila nuk ka mundur që të menaxhojë situatën me pandeminë. Sipas saj, kjo qeveri nuk ka asnjë plan konkret për rimëkëmbjen ekonomike.
“Besoj se nuk ka qytetarë në Kosovë që nuk është i vetëdijshëm tani që kjo qeverisje është një qeverisje ilegale dhe jo legjitime.
Kjo qeveri është jo kushtetuese dhe jo ligjore. Po ashtu ka dëshmuar që është e paaftë për të qeverisur vendin. Kjo qeveri e ka kolapsuar totalisht vendin, për shkak të mungesës së dijës për të menaxhuar pandeminë.
Kjo qeveri nuk ka asnjë plan konkret për rimëkëmbje ekonomike, përveç pakos emergjente që ka mbetur në gjysmë. Kosovës i nevojitet më shumë se asnjëhere e cila dëshmoi se mund të qeveriset me duar të pastërta. Kjo qeveri e katastrofës humanitare drejt së cilës po e qon vendin, duhet të shkoj”, tha ajo.
Kosova ka nisur negociatat me partnerët ndërkombëtarë, që veprojnë në fushën e shëndetësisë, si Agjencinë për Fëmijë të Kombeve të Bashkuara (UNICEF) dhe Organizatën Botërore të Shëndetësisë (OBSH), për të siguruar vaksinën kundër koronavirusit. Në botë janë duke u zhvilluar mbi 100 vaksina kundër koronavirusit.
