Presidenti i Serbisë, Aleksandër Vuçiç nuk përcolli asnjë reagim pasi Haradinaj komunikoi dje dorëheqjen e tij të parevokueshme nga posti i kryeministrit të Kosovës.
Vuçiç mblodhi dje të gjithë udhëheqësit serbë. Pas kësaj mbledhje urgjente, pritet që sot Vuçiç të dalë në një konferencë për mediat, lidhur me qëndrimin e tij për aktin e Haradinajt.
Haradinaj thotë se vendimi vjen pas një thirrje për t’u paraqitur dhe për t’u marrë në pyetje nga Specialja si i dyshuar.
Kjo është hera e dytë që Haradinaj jep dorëheqjen nga posti i kryeministrit. Ai dha dorëheqjen nga posti i kryeministrit të vendit më 8 mars të vitit 2005, për t’u dorëzuar vullnetarisht në gjykatën për krime lufte ne hapësirat e ish Jugosllavisë, prokuroria e së cilës e akuzonte atë dhe dy bashkëluftëtarë të tij për krime lufte.
Procesi kundër Haradinaj filloi më 5 mars të vitit 2007, dhe përfundoi në prill të vitit 2008 me pafajësinë e tij. Ai u rikthye ne rigjykim të pjesshëm në korrik të vitit 2010, që ishte rasti i parë i atij lloji në veprimtarinë e Gjykatës Ndërkombëtare për Krime lufte në hapësirat e ish Jugosllavisë.
Më 29 nëntor të vitit 2012, ai sërish u shpall i pafajshëm.
Tani ai është zyrtari më i lartë i thirrur për t’u paraqitur në Hagë, ku deri tani janë ftuar dhjetëra ish pjesëtarë të Ushtrisë Çlirimtare të Kosovës.
