Partia Demokratike, me anë të një letre i ka kthyer përgjigje Policisë së Tiranës, duke i hedhur poshtë pretendimet se gjatë protestës së fundit është ushtruar dhunë ndaj ministrave apo deputetëve të qeverisë. Në një letër të siguruar nga “Panorama”, Sekretari i Përgjithshëm i PD-së, Gazmend Bardhi, citon se argumentet e policisë tregojnë padije dhe përdorim politik.
“Asnjë anëtar i qeverisë apo deputeti i Kuvendit të Shqipërisë nuk është dhunuar apo goditur. Mashtrimi juaj institucional, se ka patur dhunë fizike dhe goditje të anëtarëve të qeverisë apo deputetëve, provon edhe njëherë njëanshmërinë tuaj politike dhe, mbani të gjitha shkeljen flagrante të ligjit.
Është e vërtetë që ka pasur një provokim të disa përfaqësuesve politik të qeverisë, të cilët tentuan të hyjnë me arrogancë mes qytetarëve protestues dhe janë larguar prej tyre nga zona që ishte planifikuar për t’u zhvilluar tubimi.
Çdo provokues, qoftë ky me imunitet nuk mund të pranohet të qëndrojë apo kalojë në zonën ku është planifikuar zhvillimi i tubimit, për të cilin ju jeni njoftuar zyrtarisht”, thekson letra e PD.
