Kryeministri Edi Rama është thirrur sot në Komisionin Hetimor për Inceneratorët, nën cilësinë e dëshmitarit. I pyetur nëse ka përfituar Lefter Koka miliona euro si pronar i këtij projekti, kryeministri tha se e njeh vetëm si Ministër Mjedisi dhe jo si pronar përfitues. I pyetur më tej nëse tre pronarët e inceneratorëve që janë në kërkim, kanë miqësi me Arben Ahmetajn, Rama iu përgjigj me ironi, duke i kujtuar Tabakut “Big Brother-in”. Rama i tha më tej Jorida Tabakut se si dëshmitar ajo e ka shkelur ligjin, ndërsa si zoti Rama mbetet i painteresuar.
Pjesë nga debati:
Edi Rama: Ju bëni të gjitha pyetjet dhe opinionet i shprehni në raport. Nuk kam ardhur këtu për asnjë aferë që të jemi të qartë.
Jorida Tabaku: Ju në cilësinë e kryeministrit keni miratuar një ligj, a është Lefter Koka, një nga pronarët që ka përfituar 4 milion euro? Një nga pronarët përfitues?
Edi Rama: Është një pyetje e eksportuar nga debati parlamentar dhe televiziv. Unë jam kryeministër dhe Lefter Kokën e njoh si Ministrin e Mjedisit. Nuk e njoh si pronar përfitues.
Jorida Tabaku: Unë kam 51 pyetje do përpiqem të jem korrekte, përgjigjet konçize. A është Alqi Bllako i cili përmes babait të tij është faktuar se ka përfituar 150 mijë dollarë, një pronar përfitues?
Edi Rama: E çmoj disponibiltetin tuaj, ju nuk keni faktuar asgjë në këtë Komision. Keni krijuar një opinion tuajin. Faktet këtu janë ato që kemi ardhur të ballafaqojmë bazuar në dokumente, jo në opinione të krijuara mbi spekulime. Nuk shoh asnjë lidhje deri tani midis rolit që kam ardhur deri këtu.
Jorida Tabaku: Zoti kryeministër, zoti dëshmitar, zoti Rama, a është Ahmetaj një mik i afërt me tre përfituesit; një nga pronarët përfitues?
Edi Rama: Unë e kuptoj që Big Brother në këtë periudhë ka krijuar audiencë, por se kush është miku i kujt, se kush fle me kë, se kush zgjohet me kë nuk janë të parashikuara në dispozitat Kushtetuese të rolit të kryeministrit. Meqë ju më thatë zoti kryeministër, zoti dëshmitar, zoti Rama, unë po ju përgjigjem si kryeministër. Eshtë jashtë kompetencave të mia që të studioj miqësitë. Si dëshmitar mendoj se po shkelni ligjin, ndërsa si zoti Rama jam i painteresuar se kanë dalë në modë pantallonat e shkurtra në dimër, qëkur mbaja pantallona të shkurtra se çfarë bëjnë të tjerët.
