Ish-kreu i Partisë Demokratike në Elbasan, Aurel Bylykbashi, i cili u shoqërua në Polici pas deklaratës “Le të ketë vëllavrasje më datë 30 qershor”, u shpreh se nuk tërhiqet nga ajo që ka thënë.
Sipas tij, qytetarëve shqiptarë po iu mohohet e drejta për të votuar të lirë, ndërsa theksoi se çdo qytetar i thjeshtë duhet të jetë i shqetësuar me këtë që po ndodh.
“Dy oficerë më kanë ndaluar për thirrjen time. Unë nuk i heq asnjë presje për atë që kam thënë. Por unë dua ta shpjegoj mirë atë deklaratë. Përpara se të jemi aktivistë politikë, jemi qytetarë. Unë mendoj se një shqiptar që ka interes më shumë se gardhi i shtëpisë së vet, absolutisht ne jemi një vend që duhet shqetësim.
Në një demokraci funksionale, duhet të ketë zgjedhje të lira. Nuk kam bërë thirrje për vëllavrasje. Nisur nga kjo që po ndodh në këtë vend, ku shqiptari nuk provohet të votojë i lirë, duke ia deformuar votën, unë mendoj se edhe një qytetar i thjeshtë duhet të jetë i shqetësuar me këtë që po ndodh. Unë mendoj se zgjedhje me një parti nuk mund të ketë, zgjedhje ku vota vidhet e grabitet nga pushteti s’mund të ketë asesi”, deklaroi Bylykbashi.
