Zyrtarë të koalicionit PDK-AAK-Nisma, të cilët morën 33.92% të votave nga zgjedhjet e 11 qershorit, nisën të deklarojnë për bashkimin e LDK-së në këtë koalicion.
Bajrush Morina, njohësi i çështjeve politike në vend, i ka dhënë dy opsione për LDK-në, se si do të mund të funksionojë ajo. Morina tha se koalicioni midis LDK-së me PAN-in i ka “vdekur nëna”, por LDK mund të bashkëqeverisë me Vetëvendosjen, në të kundërtën të rrijë në opozitë.
Madje, anëtarët e LDK-së të cilët mund të mendojnë sërish për një bashkim me PDK-në, Morina i ka quajtur “burracakë”.
“Koalicionit mes PDK përkatësisht PAN it me LDK-në kujtoj se “i ka vdekur nëna!”. Ata burra të LDK-s që mendojnë për një koalicion të tillë janë “burracakë” ndërkaq në fund do të përfundojnë bashkë me LDK-në në një “azil pleqsh” me një karrige dhe peshqir para dere. LDK pas zgjedhjeve të 11 Qershorit është tjetër LDK nga ajo e vitit 2014. Prandaj LDK tash ka dy rrugë, o në bashkëqeverisje “nënshtruese” me Vetëvendosjen ose në opozitë. Çdo rrugë tjetër është pa kthim dhe e rrezikshme për të ardhmen e kësaj partie”, ka thënë ai.
Ndryshe nga Morina, analisti Mazllum Baraliu ka deklaruar për “Indeksonline” se një bashkim PAN-LDK mund të ndodhë dhe kjo nuk duhet të jetë befasi, marrë parasysh zgjedhjet e 2014-ës.
“Vetëm në politikë mund të jetë e mundur që të ketë kombinime dhe ndoshta kalkulime të ndryshime të subjekteve politike, sepse qëllimi kryesor i futjes në politikë i secilit subjekt është që të marrë pushtet dhe të ushtrojë pushtet. Aq më tepër, tek ne fatkeqësisht më shumë se kaq edhe që të përfitojë nga pushteti. Duke u bazuar në vitin 2014 për disa muaj është konsideruar si formulë e pamundur si veprim i papranueshëm dhe i parealizuar, por kjo ndodhi”, është shprehur ai.
