Ish-sulmuesi i Barcelonës, Samuel Eto’o, ka folur rreth krizës që ka përfshirë klubin katalanas.
Ai ka komentuar edhe zërat për një largim të mundshëm të Lionel Messi. Eto’o mendon se klubi duhet të bëjë gjithçka për të bindur argjentinasin të qëndrojë.
“Messi është si djali im. E dua atë si djalin tim dhe dua më të mirën për të. Barcelona është Messi. Mendoj se nëse Messi largohet, duhet të gjejmë një tjetër emër për klubin. Mendoj se ishte fat që tek Barcelona kishim lojtarin më të mirë të historisë dhe duhet të bëjmë gjithçka për ta bindur që ta mbyllë karrierën tek klubi ynë. Të parët që vuajnë kur nuk shkojnë mirë gjërat janë lojtarët. Të luash në klube si Barça, Reali apo Man.United duhet të fitosh gjithmonë, nuk mjafton të shkosh në finale. Xavi? Një ditë do të stërvisë klubin. Koman? Nëse klubi vendos për të do t’i urojmë fat, pasi e njeh shumë mirë klubin dhe ka kapacitetin për të qenë trajneri ynë”, tha ai.
