Turqia ka larguar pak ditë më parë anijen “Oruc Reis” nga brigjet e Mesdheut Lindor, duke shënuar kështu një hap pozitiv lidhur me tensionet e lindura me Greqinë.
Mirëpo, sipas gazetës patriotike turke “Yeni Safak”, shkaku i largimit të anijes është thjesht një pushim i shkurtër derisa të zhvillohet dialogu me palëve në NATO.
Nga ana tjetër, kryeministri grek ka shpallur masa të reja sa i përket përforcimit të sektorit të Mbrojtjes së vendit dhe arsenalit ushtarak.
“Është koha për të forcuar forcat e armatosura si një trashëgimi për sigurinë e vendit, por edhe si një detyrim suprem ndaj grekëve që do të mbajnë koston. Kështu që sot unë shpall 6 vendime kryesore që rrisin fuqinë, funksionalitetin dhe efektivitetin e ushtrisë greke: Së pari, forca jonë ajrore menjëherë fiton një skuadrilje prej 18 avionësh luftarakë Rafale me zëvendësimin e menjëhershme të Mirageve të vjetër”, tha ai nga Selaniku.
Sipas Mitsotakis do të blihen gjithashtu nga Franca 4 fregata të reja, do rinovohen 4 të tjera, do të rinovohet arsenali i këmbësorisë, marinës detare dhe forcave ajrore. Gjatë 5 viteve të ardhshme do të futen në ushtri 15.000 burra dhe gra. Do të rifillojnë punën repartet e industrisë së armëve të specializuara për mirëmbajtjen e anijeve luftarake dhe avionëve, ndërsa do të fillojë menjëherë futja e sistemeve të reja dixhitale dhe hibride në ushtri.
