Kryeministri Edi Rama ka dhënë direktivat për socialistët. Ai ka dhënë porosi të prerë në Asamblenë e PS-së, për procesin e zgjedhjes së kryetarëve të rinj të partisë. “Të mos përfundojmë si kundërshtarët tanë”, tha më tej kreu i qeverisë në mbledhjen e Asamblesë së PS-së. Kryesocialisti kërkoi forcimin dhe organizimin e strukturave të partisë. Sipas tij, PS-ja në territor duhet të jetë e votuesve, dhe këshilloi që vetëm në këtë mënyrë nuk do të përfundojnë si kundërshtarët politikë.
“Garancinë për të qenë në krye të vendit na e jep një PS që arrin në territor të na përfaqësojë me dinjitet, dhe të komunikojë ashtu si duhet me njerëzit. Pa harruar asnjëherë që anëtarësia jonë reale është 60-70 mijë, ndërsa votuesit janë 600-700 mijë dhe më shumë.
PS-ja në territor duhet të jetë e votuesve tanë. Kjo është shumë e rëndësishme ta kuptojmë sot përpara se të jetë vonë. Përpara se larg qoftë të përfundojmë siç kanë përfunduar kundërshtarët tanë.
Kjo është pjesa më e rëndësishme e këtyre dy muajve ku hyjmë. Për të pasur në fund të qershorit një grup kandidaturash për 60 Bashkitë, që të përmbushë këtë qëllim. Në shtator- tetor të vijojmë me të njëjtën mënyrë për kandidaturat për njësitë bashkiake. Paralelisht me gjithë organizimin e partisë në territor”, tha Rama.
