Jozefina Topalli, pas një heshtjeje disa ditore për moskandidimin e saj për deputete, reagoi sot ashpër ndaj Lulzim Bashës me një deklaratë.
Jo vetëm kaq, por në një konferencë për median, ajo së bashku me Imamin kërkuan mbledhjen e forumeve të PD-së për shkarkimin e Lulzim Bashës.
“Në një moment shumë delikat dhe kritike për PD-në, kemi menduar të jemi bashkë me Imamin në këtë komunikim me median.
Nga data 26 maj kjo nuk është më PD-ja e 1990.
Jo sepse mungoj unë, por shpirti i PD-së është zëvendësuar me llogarinë e ftohtë të Bashës. Për shkak të kaosit, të bojkotit që demokratët po i bëjnë kësaj fushate, të preokupuar për faktin se Edi Rama do të sundojë dhe qëndrojë në krye të qeverisjes për një kohë të gjatë. Unë nuk i di marrëveshjet mes Bashës dhe Ramës. Kam dyshimet e mia, megjithatë preokupimi im është Partia Demokratike.
Për më gjatë vazhdon zoti Imami”, tha Topalli, ndërsa më pas vijoi Imami:
“Vlerësojmë se gjendja e krijuar mbas publikimit të listave të PD-së ka krijuar një shqetësim të madh, reagim qytetar, nga kandidatë të partisë që janë në lista.
- Ne kuptojmë që mesazhi i tyre është që nuk mund të largohet Rama duke shkatërruar PD-në.
2. Vendimi për këto lista është marrë nga një person i vetëm.
- Kërkojmë si zgjidhjen e vetme mbledhjen e forumeve për shkarkimin e personit përgjegjës që është zoti Lulzim Basha.“Gjithashtu Imami shprehu si një ndër shqetësimet kryesore mospërfshirjen në listat e kandidatëve për deputetë, prurjet 2013-ës dhe 2015-ës, të cilët kontribuan dhe arritën rezultate edhe në zgjedhjet e kaluara vendore.
