Kreu i PD-së, disa muaj pas humbjes së thellë në zgjedhjet e 25 qershorit, ka folur lidhur me listën e tij të shumëkritikuar.
I ftuar në emisioni “Opinion”, Lulzim Basha tha se pas rezultatit ka reflektuar lidhur me emrat që vendosi në listën e kandidatëve për deputetë në PD, por nuk është penduar.
“Penduar jo, por kam reflektuar”, tha kreu i demokratëve, i cili para dy ditësh u kritikua publikisht nga ish-kryeministri Berisha.
Më tej Basha u shpreh se kjo është hera e fundit që listat i bën kryetari i partisë. “Nga këtej e tutje vendimmarrja do i takojë jo thjesht forumeve, por anëtarësisë së Partisë Demokratike”.
I pyetur nga paneli i gazetarëve për emrat e vjetër të PD-së, Basha deklaroi se “asgjë personale nuk ka pasur në vendimmarrje, por debatit për emra konkretë nuk i futet”.
