Kuvendi i ka ndërprerë sinjalin e transmetimit Komisionit Hetimor për 25 prillin, pas largimit të PS-së nga mbledhja. Një përfaqësuese nga administrata e Kuvendit, ka kërkuar që të ndërpritet sinjali, por Alibeaj është shprehur se çdo ndërprerje sinjali është e jashtëligjshme, dhe se do të ketë kallëzime penale.
Por pavarësisht kërcënimeve të lëshuara nga kryekomisioneri Enkelejd Alibeaj për sekretaret e Kuvendit, institucioni menjëherë ndërpreu sinjalin e mbledhjes së Komisionit Hetimor të zgjedhjeve të 25 prillit.
Demokratët nuk e kanë lënë me kaq, por në kundërpërgjigje kanë realizuar vetë mbledhjen dhe me regji nga Facebook-u. Deputetët e PD-së po bëjnë raportim mbi provat e mbledhura, për shkeljet e pretenduara gjatë zgjedhjeve parlamentare.
Oerd Bylykbashi është ndalur te disa prej pikave, ku sipas tij, ka shkelje të ligjit. “Nëpërmjet verifikimit të fondeve publike, synohet të faktohet masakra e 25 prillit, si pasojë e transfertave të pakufizuara për tërmetin, me qëllim maksimalizimin e votave të PS-së. Për të provuar lidhjen midis këtyre veprimeve të shtetit, në ndryshim me kodin zgjedhor, do theksoj blerjen e votës nëpërmjet shtesës buxhetore. Dhënia e granteve për periudhën zgjedhore”, tha Bylykbashi gjatë fjalës së tij.
