Presidenti Ilir Meta nuk i ka kursyer akuzat ndaj kryetarit të KED-së, Ardian Dvorani, të cilin e quajti një “ushtar të verbër të partisë”.
I revoltuar me situatën ku ndodhet Gjykata Kushtetuese, kreu i shtetit deklaroi gjatë një konference për shtyp, se me një sjellje rrugaçërore dhe mafioze, kërkojnë t’i rrëmbejnë kompetencat që ia njeh Kushtetuta.
“Të ndërtosh një proces me kaq shumë probleme dhe të përpiqesh ta banalizosh me histori të tilla, aq më tepër kur bëhet fjalë për ndërtimin e Gjykatës Kushtetuese, që s’duhet të kishte qenë e mbyllur asnjë ditë, dhe kjo ka ndodhur qëllimisht, ua kam thënë njëmijë herë, edhe diplomatëve të korruptuar. U kam thënë se ne kemi bërë një marrëveshje, kur kemi vendosur që Gjykata Kushtetuese të kalonte në Vetting, se ajo nuk do ngelej asnjë ditë e mbyllur.
Mund të kishte vakanca, por jo zero anëtarë. Nuk ka ndodhur kjo situatë prej Vettingut, por se në krye të KED erdhi një ushtarë i verbër i partisë. KED e parë u bllokua se nuk iu pëlqyen emrat, pastaj u vendos një ushtar i partisë, që vë në pozitë Presidentin, që ose të shkelë Kushtetutën me pahir, ose me lojëra të tillë të turpshme, që as ca fëmijë rrugeçër nuk i bëjnë, që të rrëmbejnë kompetencat që ia ka dhënë Kushtetuta, në mënyrë mafioze. Kjo është e vërteta”, deklaroi Meta.
