Gazetarja Anila Basha ka treguar detaje nga fillimet e para si gazetare tek “Koha Jonë”, teksa ishte e ftuar në emisionin “Soiree”. Ajo tregoi rastin se si lajmi që kishte gjetur dhe që mendonte të hapte gazetën, nuk u publikua pas një ndërhyrje të Edi Ramës. Për ‘fatin e saj të keq’, kryeredaktori në atë kohë, Armand Shkullaku ishte vënë në dijeni të lajmit, para se ajo të shkonte në redaksi. Ky lajm nuk u bë kurrë, dhe ajo kujton atë periudhë se si Rama kishte bërë pazar me Shkullakun.
“Kam pasur Shkullakun asokohe kryeredaktor tek gazeta “Koha Jonë”, dhe Edi Rama ka qenë Ministër Kulture. I kam gjetur Ramës një vendim qeverie për një monument kulture, dhe ai më kapi dhe më tha që nuk ke për ta bërë lajm.
Unë më arrogancën time i kam thënë ‘kush je ti? Lajmin sigurisht që do ta bëj’, ndërkohë ai me batutat e veta që të çarmatoste’. Më pas iki me gjithë qejf në redaksi, sepse kisha lajmin ekskluziv për të hapur gazetën, por lajmi i Ramës kishte shkuar më herët tek Armand Shkullaku përpara se të shkoja unë.
Fillova të qaja se mezi e kisha gjetur atë dokument, ndërsa Edi Rama kishte bërë pazar me Shkullakun. Iku lajmi, u harrua, nuk u bë. Prandaj them që meshkujt janë për pazar, ndërsa ne jemi për sakrifica”.
