Një ekip kërkimor japonez ka zbuluar se acidi ferulik, një përbërës natyror që gjendet në oriz, kafe dhe disa perime, mund të ndihmojë në parandalimin e sulmeve në zemër.
Studimi, i udhëhequr nga Dr. Kento Yoshioka, Dr. Keisuke Obara dhe Prof. Yoshio Tanaka nga Departamenti i Farmakologjisë Kimike në Shkollën e Farmacisë të Universitetit Toho, përdori arteriet koronare të derrit, të cilat janë shumë të ngjashme me ato të zemrës njerëzore.
Rezultatet treguan se acidi ferulik ul ndjeshëm tkurrjen e arterieve.
Ekipi identifikoi dy mekanizma kryesorë përmes të cilëve vepron ky përbërës: së pari, ai pengon hyrjen e kalciumit në qelizat muskulore përmes kanaleve të kalciumit të tipit L, të cilat luajnë një rol kyç në tkurrjen e arterieve.
Së dyti, në mungesë të kalciumit, ai parandalon ngushtimin e arterieve duke frenuar aktivizimin e një proteine të quajtur ‘zinxhir i lehtë i miozinës’, e rëndësishme për tkurrjen e muskujve.
Sipas rezultateve të studimit, në disa raste acidi ferulik u tregua më efektiv sesa diltiazemi, një ilaç i përdorur gjerësisht për relaksimin e enëve të gjakut.
Ky zbulim, sipas Dr. Yoshioka, mund të hapë rrugën për metoda natyrale të mbështetjes së shëndetit kardiovaskular, qoftë përmes ushqimit apo në formën e suplementeve.
