Një ngjarje e rëndë ka tronditur mëngjesin e sotëm qytetin e Lezhës, ku është ekzekutuar në një atentat me armë zjarri Aleksandër Ndoka, vëllai ish-deputetit socialist Arben Ndoka. Ngjarja ka ndodhur shumë pranë banesë së viktimës ku është qëlluar në makinën e tij tip “Mitcubish”. Trupi u gjet në makinë në orën 4:25 në lagjen “Nënë Tereza” në Lezhë. Banorët e zonës thanë se nuk kanë dëgjuar të shtëna. Aleksandër Ndoka është baba i 4 fëmijëve.
Nga ana tjetër Aleksandër Ndoka, ishte këshilltar bashkiak i Lezhës dhe rezulton si një person pa precedentë penalë. Kështu thuhet në formularin e dekriminalizimit, që ai e ka dorëzuar në KQZ për të vijuar detyrën si këshilltar bashkiak.
Njëkohësisht kujtojmë se ai në Lezhë ishte pronar i një biznesi durë alumin. Ndërsa nga të dhënat e para bëhet e ditur se ai nuk rezulton të ketë qenë një person problematik. Por, të dhëna të tjera bëjnë të ditur se një piste e mundshme hetimi lidhur me vrasjen e tij ka të bëjë më një konflikt të të birit të tij Samuel Ndoka, i cili u përfshi në një sherr që përfundoi në kanosje me armë zjarri ndaj një aktivisti të LSI në zgjedhjet e 25 qershorit në qarkun e Lezhës.
Samuel Ndoka, 19 vjeç (djali i Aleksandër Ndokës që u vra sot) akuzohet se së bashku me kushëririn e parë Danjan Ndoka dhe disa persona të tjerë nën kërcënimin e armës kanë kanosur dhe dhunuar ditën e zgjedhjeve të 25 Qershorit, aktivistin e LSI-së, Florjan Dushku, njofton Report tv. Samuel Ndoka dhe Danjan Ndoka u arrestuan në datë 28 tetor, ndërsa u prangosën edhe dy bashkëpunëtorë të tij. 
Por ky nuk është konflikti i parë i Samuel Ndokës, që u arrestua në datë 28 tetor në Tiranë me një pistoletë me 7 fishekë, pasi është një emër i njohur për policinë. Samuel Ndoka së bashku me Klajdi Ndokën dhunuan edhe nënkryetarin e qarkut të Lezhës, Agustin Marku duke e goditur disa herë me grushte dhe shqelma në një lokal në 20.02.2017.TIRANA TODAY
