Robert Lewis Coleman dhe George De Long, ishin duke udhëtuar të dielën e 6 prillit 1924 nga Tirana në Shkodër, kur ranë pre e një atentati, duke mbetur të vdekur ne vend. Që të dy nga Kalifornia, Coleman dhe De Long vinin nga familje të pasura, dhe kishin studiuar në universitetet më të mira. Ata ndodheshin në Shqipëri si turistë.
Vrasja e tyre bëri bujë me mediat ndërkombëtare dhe sidomos ato amerikane. Edhe legata amerikane në Tiranë, reagoi me forcë, duke kërkuar zbardhjen e shpejtë të ngjarjes, dhe ndëshkimin e autorëve.
Qeveria angazhoi mbi 2 mijë ushtarë të kontrollonin zonën e malësisë së Krujës, duke vrarë dhe arrestuar dhjetëra të dyshuar. Sejfi Vllamasi që sapo kishte lënë detyrën e Ministrit të Brendshëm, pretendon se banditët kishin ngatërruar objektiv. Sipas tij Ahmet Zogu kishte urdhëruar vrasjen e disa malësorëve, për të shkaktuar kaos dhe destabilitet, pasi vetëm kështu mund të forcohej autoriteti i tij.
Dhe në fakt i pandehuri kryesor Vesel Hidri, pranoi se e kishte marrë këtë urdhër nga Zogu përmes një letre, që megjithatë nuk u bë kurrë publike. Situata politike dhe sociale u polarizua ne ekstrem, dhe 2 javë më vonë u qëllua dhe vdiq pas 2 ditësh në spital Avni Rustemi, njëri nga udhëheqësit e opozitës.
Pak javë më vonë nisi një rebelimin, që përfundoi me largimin e Zogut, dhe ngjitjen e përkohshme në pushtet të Fan Nolit. Në një roman të sajin, shkrimtarja shqiptare me banim në Gjermani Anila Vilms, pretendon se vrasja e 2 amerikanëve në Mamurras, ishte një vepër e shërbimeve sekrete serbe, për të destabilizuar Shqipërinë.
