Autoritetet italiane kanë shkatërruar dy banda kriminale të cilat ishin të lidhura me dy mafiet më me emër si Camorra dhe Ndragheta-n, që vepronin të përqendruara kryesisht në Romë, raporton romatoday.it.
Mediat e vendit fqinj bëjnë të ditur se operacioni i antimafias dhe i karabinierëve u zhvillua mes Romës dhe Napolit dhe përfundoi me se paku 19 të arrestuar mes të cilëve edhe shqiptarë. Midis 19 të arrestuarve ishte edhe një grua. Mbi anëtarët e dy bandave rëndojnë akuzat e përdorimit të armëve, trafikimit të paligjshëm të kokainës dhe kryerja e krimeve të rënda.
Gjithashtu është zbuluar edhe identiteti i një shqiptari pjesë e bandave i njohur si Arben Zogu, ku policia ka zbuluar lidhjet e tij me Massimo Carminatin. Sipas prokurorisë italiane, bandat udhëhiqeshin nga vëllezërit Salvatore dhe Genny Esposito dhe tjetra udhëheqej nga Vincenzo Polito Esposito që menaxhonin shpërndarjen e “mallit” duke e sjellë në Romë modelin e shitjeve napoletane. Sipas policisë italiane në aksion morën pjesë rreth 200 karabinierë të Komandës Provinciale të Romës në bashkëpunim me atë të Napolit, me helikopterë dhe qen antidrogë.
Akuzat janë disa, që nga trafik i paligjshëm i substancave narkotike, armë, dhunë dhe përdorim të metodave mafioze. TIRANA TODAY
