Me ekzekutimin e 27-vjeçarit Indrit Pepa, shënohet viktima e dytë brenda pak orëve në Mamurras. Viktima Indrit Pepa, rreth 27-vjeç, është baba i një fëmije.
Vrasja është shënuar në lagjen “Zef Hoti”, në periferi të Mamurrasit. Paraprakisht, nga burime jo zyrtare flitet se viktima mund të ketë pasur dje një konflikt të çastit me disa persona.
Uniformat blu kanë nisur hetimet, e ndërsa mësohet se viktima është qëlluar disa herë me kallashnikov.
Policia, përmes një deklarate zyrtare bën me dije se i riu ka ndërruar jetë rrugës, teksa po transportohej për në spital. Sakaq, një 49-vjeçar me inicialet A.M., i cili dyshohet se është autor i krimit, është shpallur në kërkim.
Policia
“Sot, rreth orës 04:30, është marrë njoftim se në Mamurras, afër xhamisë së qytetit, është plagosur me armë zjarri shtetasi I.P. 27-vjeç, banues në Mamurras, i cili është transportuar për në Spitalin e Traumës në Tiranë, por rrugës ka ndërruar jetë.
Falë veprimeve të shpejta hetimore, u bë i mundur identifikimi i autorit të dyshuar, shtetasit A.M. 49-vjeç, banues në Mamurras, i cili u shpall në kërkim dhe po punohet për kapjen e tij.
Grupi hetimor në vendngjarje, nën drejtimin e Prokurorisë së Rrethit Gjyqësor Kurbin, vazhdojnë hetimet për zbardhjen e plotë të rrethanave të ngjarjes”.
Kjo është vrasja e dytë brenda pak orëve në Mamurras, pasi mbrëmjen e djeshme pas një sherri të çastit mes adoleshentëve, një 14-vjeçar ka qëlluar me thikë për vdekje bashkëmoshatarin e tij.
Duket se vendi ynë nuk po gjen gjetësi pas disa vrasjeve të ndodhura në seri, ku mbeten ende pa autorë.
https://tiranatoday.com/te-shtena-me-arme-zjarri-ne-mamurras-ekzekutohet-27-vjecari/
