Ngjarja që tronditi mbrëmë kryeqytetin mbetet ende një mister për vetë faktin që thuajse çdo minutë del ndonjë detaj i ri rreth saj. Në konfliktin e armatosur, ku një person mbeti i vrarë dhe disa syresh të plagosur, janë përfshirë edhe emra si Ervis Martinaj apo Ervin Mata.
I pari, Martinaj, biznesmen që zotëron pikat e basteve në kryeqytet, e gjithashtu emër i njohur për disa konflikte të mëparshme. Ndërsa i dyti, Mata, është i dashuri i këngëtares Elvana Gjata dhe po ashtu biznesmen i fuqishëm në vend.
Por kush është Eljon Hato, 28-vjeçari i plagosur nga ky sherr dhe që ndodhet në gjendje kritike për jetën? Eljon Hato është nga Shkodra, ka qenë i burgosur në Lezhë pasi mbi të rëndonte akuza e vrasjes, një ngjarje e ndodhur në vitin 2014. Gjithashtu në vitin 2015 Hato ka porositur nga burgu vrasjen mjekut Agron Terolli, por që asokohe mjeku i shpëtoi mrekullisht atentatit. Por cilat janë dyshimet mbi motivin që shtynë të dënuarin për vrasje të paguajë për kokën e mjekut?
Vrasja në Shkodër në vitin 2014
Viktima Indrit Hylli dhe i plagosuri Jetmir Molla, po qëndronin në një lokal në fshatin Zus, ndërsa autori Eljon Hato ndodhej po në të njëjtin lokal, por në një tjetër tavolinë. Sipas policisë, brenda lokalit ka pasur dhe dy persona të tjerë, që kanë qenë të njohur me personat e përfshirë në konflikt, por kanë qenë në një tjetër tavolinë.
Nën efektin e alkoolit, kur ora shënonte 03:00 e mëngjesit, mes personave të përfshirë në konflikt ka filluar një debat, i cili në fillim ka nisur me shkëmbime fyerjesh banale dhe më pas 26-vjeçari ka qëlluar me armën e zjarrit pistoletë, në fillim në drejtim të shtetasit Indrit Hylli, duke e lënë të vdekur në vend.
Më pas ka qëlluar dhe në drejtim të shokut të viktimës, shtetasit Jetmir Molla, i cili për fat ka marrë vetëm një plagë në këmbë. Menjëherë pas ngjarjes, autori është larguar pa rënë në “dorë” të policisë, ndërsa dy personat e qëlluar janë dërguar me shpejtësi në spital nga punonjësit e lokalit.
Por, për shkak të plagëve të rënda, 22-vjeçari Indrit Hylli nuk ka mundur t’i shpëtojë vdekjes. Ndërsa i plagosuri Jetmir Molla, sipas mjekëve, është jashtë rrezikut për jetën, pasi plumbi i marrë nuk ka dëmtuar ndonjë arterie.
Njoftimi i vitit 2015 nga mediat për këtë ngjarje:
Djali i doktorit kohë më parë ka plagosur me armë zjarri pa leje një person duke e lënë të paaftë fizikisht dhe dënimin për këtë vepër penale po e kryen në burgun e Shën Kollit në Lezhë, aty ku qëndron edhe Eljon Hato.
Pikërisht këtu është përqendruar policia në një nga pistat e hetimit, për një hakmarrje të mundshme ndaj djalit të mjekut duke i ekzekutuar babanë. Megjithatë ende nuk dihet se cila është lidhja e të dënuarit Hato me personin që ka mbetur i gjymtuar nga plumbat e djalit të mjekut.
Një tjetër pistë që policia po heton është edhe ajo e vrasjes së mundshme për shkak të detyrës.
I paguar nga Hato për ekzekutimin e mjekut Terolli ka qenë Osman Mulja, i cili edhe u arrestua.
