Grida Duma dhe Alfred Rushaj kanë lënë mandatin e deputetit në PD. Avokati Ledio Braho, në një intervistë për “Euronews Albania” tha se mandati i Dumës i kalon Ori Nebijajt, pasi në zgjedhjet e 2021 ka siguruar 5599 vota preferenciale, ndërsa mandati i Rushajt i kalon Petrit Doda. Nëse Dodaj dhe Nebijaj nuk pranojnë mandatin brenda 30 ditësh, mandati i kalon Lediana Fratajt dhe Asllan Dogjanit.
“Nëse Ori Nebijaj dhe Petrit Dodaj nuk pranojnë të marrin mandatin e deputetes, është Lediana Frataj dhe Asllan Dogjani, të cilëve do u ofrohet mundësia për të qenë deputet. Këto kanë 30 ditë kohë për të dorëzuar një përgjigje, nëse do e pranojnë mandatin ose jo”, tha ai.
Dje qetësia në kapin opozitar u trazua për shkak se Alfred Rushaj ka hequr dorë nga mandati i deputetit të Partisë Demokratike. Vendin e Rrushajt në Kuvend do ta zërë Petrit Doda, i cili ka qenë i renditur i 32-ti në listën e kandidatëve të demokratëve në Tiranë për zgjedhjet e 25 prillit të vitit të kaluar. Doda në zgjedhjet parlamentare të vitit 2021 ka marrë 5987 vota, por duket se nuk e ka lajmëruar njëri për mandatin e fituar si deputet në Kuvend, pasi është shprehur se e ka marrë vesh lajmin nga mediat, por deri tani ai nuk është kontaktuar as nga partia dhe as nga Komisioni Qendror i Zgjedhjeve. “Po e shoh në lajme, deri më tani nuk kam marrë asnjë informacion as nga partia dhe as nga KQZ”, deklaroi dje Doda. E ndërsa sot Grida Duma njoftoi lënien e mandatit të deputetes së PD-së. Mandati i Grida Dumës i kalon Oriela Nebijaj, pasi në zgjedhjet e 2021 ka siguruar 5599 vota preferenciale.
