Nga: Ylli Pata
Duke marrë për bazë moshën e ish-kryeministrit, ai veprim i dhunshëm ndaj tij është i rëndë, madje shumë. Por logjikisht ai është një akt që një politikan e lë pas krahëve, por dhe e heton se pse ndodhi dhe kush e bëri.
Berishjanët e kanë skemën gati: e bëri Edi Rama. Po pse e bëri Edi Rama? Çfarë fitoi ai nga grushti ndaj Berishës? Nëse Saliu nuk do të ishte goditur, nuk do të ishte gjithë ky marketing a thua se në Tiranë është bërë nami. Po përse bodyguardët e doktorit, të cilët mediat pranë tij i kanë përshkruar si të pagabueshëm, e lanë Gertin që të depërtojë në perimetrin e sigurisë dhe ta godasë Berishën në syrin e majtë?
Gabuan? Ok gabuan! Normale është, po si ka mundësi që përveç se e mbytën në dru, atentatorin e Berishës e çuan dhe e morën peng në selinë e PD? Kjo është vepër e pastër penale. E pak momente pasi Gerti kishte qenë në katakombet e SHQUP, Sali Berisha tha se ai është agjent i policisë kriminale, më pas se është kontigjent.
Realisht çfarë është njeriu që sulmoi Berishën, agjent apo kontigjent? Pasi një kontigjent, duhet të jetë provuar me vendime gjykate, ndryshe, kush nxjerr një të dhënë ndaj tij shkel ligjin.
Berisha tha se ai është i “manovrueshëm”, Pra logjika ishte se ai ka marrë para për të grushtuar ish-kryeministrin. Ka fakte për këtë? Se në fillim thanë është nga Tepelena, që ishte një nga ato skandalet e vitit 97. Sepse në fund të fundit nuk ka lidhje origjina. E kapnin, ja dorëzonin policisë dhe kaq. Nëse e merrnin vetë në pyetje nuk se ja njihte njeri. Por edhe pse e grinë në dru live, Gerti nuk vdiq, por i ndoqi truprojat siç donin.
Gjithsesi dhuna ndaj Berishës është e rëndë, se ai i gjuajti me grusht, e kjo është realisht problem. Por ky është problem i sigurisë së Berishës në radhë të parë i rëndë. Në radhë të dytë duhet pritur rrëfimi i Gerti Shehut. i cili edhe pse është nga Tepelena nuk se përbën krim. E mbajtën në PD, duhet të thonë atë që mëron nga deponimi i njeriut që morën peng. Megjithatë skandali sot është i Policisë së Shtetit, e cila ka toleruar që të mbahet peng një qytetar, thjesht sepse i ka dhënë liri një policie partiake. Si balilat e Musolinit…
