Kryeministri në detyrë i Kosovës Albin Kurti përgjatë një konference për mediat, e ka kundërshtuar vendimin e Presidentit Hashim Thaçi për t’i dhënë mandatin për formimin e një qeverie të re “cilësdo parti që siguron shumicën në Kuvend”.
Kurti paralajmëroi se partia e tij, Lëvizja Vetëvendosje, e cila doli e para në zgjedhjet e fundit në vend, do ta çojë Thaçin në Gjykatën Kushtetuese.
“Këto përpjekje, këto orvatje antikushtetuese, vetëm sa e rrezikojnë rendin republikan, e shtetin demokratik të Kosovës. Nuk mund ta shtypin vullnetin e popullit, dhe të na kthejnë para datës 6 Tetor.
Presidentit të Republikës i kanë mbetur edhe disa muaj mandat dhe po dëshiron ta kapë trenin e fundit. Por, i ka ikur edhe treni i fundit. S’ka më trena për Presidentin”, u shpreh Kurti.
