Albin Kurti ka mbajtur ditën e sotme konferencën e tij të parë si kryeministër i Kosovës.
Gjatë fjalës së tij në konferencë, Kurti përsëriti qëndrimin e tij se taksa 100 % ndaj mallarave serbe do të zëvendësohet me reciprocitet të plotë. Ai është shprehur se edhe opozita është dakord që reciprociteti është një parim për marrëdhëniet konstruktive.
“Ne nuk i vendosim Serbinë dhe Bosnjën në të njëjtën fjali asnjëherë edhe për shkaqe historike edhe për arsye aktuale. Ne konsiderojmë që jemi këtu ku jemi si qeveri e re edhe për shkak të zotimit tonë që me Serbinë do të kemi reciprocitet politik, ekonomik e tregtar si zëvendësim për tarifën 100 për qind. s’themi se do të kthehemi në marrëdhënie asimetrike, por do ta avancojmë duke shndërruar subjektivitetin tonë në çështje integriteti me parimin që njihet për vlerën e tij në raportet ndërfqinjësore – reciprociteti. Edhe LDK-ja, edhe VV-ja, mbi 60 për qind të votave në Kosovë në mesin e shqiptarëve, ishin me parimin e reciprocitetit. Edhe ata që sot janë në opozitë apo që s’na votuan mund të mos pajtohen me ne për gjëra të ndryshme, por për reciprocitetin janë pro. Këtë parim për marrëdhënie konstruktive do ta ketë princip pune”, tha ai.
Kurti e mbajti këtë konferencë pas takimit të tij me shefen e BE-së në Kosovë, Nataliya Apostolova.
Kjo e fundit nuk ka pranuar të komentojë reciprocitetin por tha se BE-ja ka qenë e qartë, duke kërkuar heqjen e taksës. Apostolova është shprehur e interesuar që dialogu Kosovë-Serbi të fillojë sërish.
