Ditën e sotme Lëvizja Vetëvendosje dhe Lidhja Demokratike e Kosovës arritën që të nënshkruanin marrëveshjen për krijimin e qeverisë së re.
Liderët e këtyre partive, përkatësisht Albin Kurti dhe Isa Mustafa sqaruan shkurtimisht nga selia e Kuvendit të Kosovës se ishin dakordësuar për formimin e qeverisë së re, ku kryetari i Parlamentit do të jetë nga radhët e LDK-së, pavarësisht se në seancën e dhjetorit të shkuar në këtë pozicion u zgjodh Glauk Konjufca nga radhët e Vetëvendosje.
Tashmë, Konjufca do të duhet ta lërë këtë post, duke shkuar në kabinetin qeveritar.
Ndërkohë, qeveria e re do të ketë 15 ministri nga 21 që janë aktualisht.
Numri është më i lartë se propozimi i mëparshëm i Kurtit për 12 ministri si dhe do të ketë 33 zv/ministra nga rreth 80 që janë aktualisht, shkruan “Panorama”.
Deklaratat në konferencën për shtyp:
Albin Kurti: U dakordësuam për të zgjedhur qeverinë e re. Ne u dakorduam të takohemi edhe nesër në Kuvendin e Kosovës për ta zgjedhur qeverinë e re dhe të jetësojmë ndryshimin e madh politik të 6 tetorit.
Ne e kemi nënshkruar marrëveshjen dhe jemi marrë vesh për të gjitha, përveç se për harmonizimin e programit. Kryetari Mustafa do mbajë mbledhje të Këshillit të Përgjithshëm.
Unë si kryetar i Vetëvendosje u njoftova se kanë filluar përgatitjet për organizimin e referendumit në Lëvizjen Vetëvendosje sepse kështu e kërkojë statutet e dy subjekteve tona.
Unë ju falënderoj për durimin dhe përkrahjen gjatë këtij procesi, i cili nuk ka qenë i lehtë, por shumë më i sigurt se sa është menduar apo transmetuar.
Mustafa: Ne kemi arritur marrëveshje. E vlerësojmë se është marrëveshje në dobi të Kosovës. Është në interes të ndryshimeve që duhet të ndodhin në vendin tonë.
Marrëveshja është rezultat i mirëkuptimit dhe një pune mjaft të gjatë me liderin e Vetëvendosje, Albin Kurti. Kemi hulumtuar të gjitha alternativat dhe kemi ardhur në një zgjidhje që e vlerësojmë se është në interes të Kosovës. Dëshirojmë që kjo qeveri të jetë e suksesshme.
Albin Kurti: Jemi dakordësuar të kemi 15 ministri, 2 zv kryeministra dhe 33 zv/ministra. Pra nga 21 ministri që i kishim në qeverisjen paraprake, tash do të kemi vetëm 15 dhe nga mbi 80 zv/ministra do të jenë 33.
Kjo tregon se qeveria jonë e përbashkët ende pa ia nisur punës ka bërë një ndryshim të madh sepse është qeveria më e vogël në shtetin e pavarur të Kosovës dhe për ta forcuar Republikën tonë si asnjëherë më parë.
Ne kemi vlerësuar që synimi ynë që të kemi 12 ministri ka qenë një synim i drejtë, mirëpo kur kemi analizuar strukturat e ministrive përkatëse, krijimi i disa super-ministrive është dëshmuar se është kosto më e madhe se sa të kemi 12 ministri.
Nëse nuk do të bënim një gjë të tillë, do të zvarritej edhe për 1 vit reduktimi për 12 ministri.
Ne jemi dakorduar që kryetari i Kuvendit e propozon lëvizja Vetëvendosje kandidatin e Lidhjes Demokratike të Kosovës dhe ecim përpara.
Nuk do të japë dorëheqje kryetari i Kuvendit, Glauk Konjufca. Ai do të vijë në ekzekutiv dhe tjetra është se është e vërtetë se ka pasur një lloj zgjatje për shkak të interesimit të madh. Ne duam të bëjmë një reformë të pesëfishtë.
Isa Mustafa: Sa i përket Presidentit, kemi vendosur që të jetë një çështje që të dakordësohemi me zt.Kurti dhe do ta zgjidhim edhe këtë çështje në kohën e nevojshme. Kryetarin e Kuvendit do ta merr ajo ose ai të cilin Lidhja Demokratike e Kosovës i ka dhënë besimin dhe qytetarët i kanë dhënë votat më të mëdha. Marrëveshjen e kemi kryer.
