E fejuara e kryeministrit britanik, Carrie Symonds, ka shprehur falenderimet e saj për stafin e spitalit që u kujdesën për Boris Johnson. Symond, e cila është në pritje të fëmijës së tyre të parë, shkruan në rrjetet sociale se mjekët kanë qenë të jashtëzakonshëm.
“Bekimet e mia shkojnë për të gjithë ata që kanë kaluar në situata të ngjashme dhe kanë qenë të shqetësuar për të dashurit e tyre. Unë nuk mund të resht së falenderuari stafin e spitalit St Thomas, kanë qenë të jashtëzakonshëm. Unë kurrë nuk do të jem në gjendje t’ju paguaj dhe kurrë nuk do të ndalem së falenderuari”, shkruan ajo.
Kryeministri i Britanisë ka dalë nga spitali, dhe kurimin do ta vazhdojë në shtëpi. Mediat ndërkombëtare shkruajnë se Johnson, të gjitha mjekimet do t’i marrë në shtëpinë e tij, ndërsa tashmë ndodhet në gjëndje të stabilizuar.
Johnson ka falenderuar të gjithë stafin mjekësor për shërbimin që ata i ofruan gjatë kësaj periudhe të vështirë, e cila zgjati rreth një javë. Më herët, shtypi britanik gjatë javës shkruante, se si shkak i përkeqësimit të situatës, Johnson nuk mund t’ia dilte. Dhe pse kryeministri britanik qëndroi në karantinë për 2 javë në shtëpinë e tij, shëndeti i tij u përkeqësua, duke u detyruar nga mjekët që të shtrohej në spital, në repartin e terapisë intensive.
