Që Shtetet e Bashkuara janë vendi mik më i mirë i shqiptarëve, kjo është treguar në shumë raste. Edhe atëherë kur marrëdhëniet diplomatike mbetën të ngrira për 45 vjet. Në vjeshtën e vitit 1962, presidenti amerikan Xhon Kenedi, paralajmëroi hapur homologun e tij komunist, Nikita Hrushov, të mos e çonte ndërmend pushtimin e Shqipërinë.
“Nëse Bashkimi Sovjetik do të pushtojë Shqipërinë, pasojat ndërkombëtare do të jenë shumë të rënda”- u shpreh Kenedi më 29 nëntor, gjatë bisedimeve për zgjidhjen e krizës së raketave kubane. Vetëm një vit më parë, Moska kishte ndërprerë marrëdhëniet diplomatike me Tiranën. Uashingtoni shpresonte se Enver Hoxha do të ndiqte shembullin e udhëheqësit jugosllav Tito, duke ruajtur regjimin komunist, por duke u afruar me Perëndimin. Për fatin e keq të shqiptarëve, Hoxha kthehu sytë nga Kina po komuniste. Në fjalën e mbajtur po atë ditë në Vlorë me rastin e 50-vjetorit të pavarësisë, diktatori do të mburrej se Shqipëria po sfidonte “ballë për ballë imperializmin amerikan dhe revizionizmin sovjetik”.
