I dyshuari kryesor i cili edhe ka rolin e ekzekutorit të Jurgen Kurtit është 38-vjeçari Klodjan Bane nga Patosi. Sipas të dhënave, ka qenë një pakujdesi e tij, që ka bërë të mundur zbulimin e grupit, ndonëse ai që ka porositur krimin, ende nuk dihet.
“Ke folur për ato lekët?”, “Kur do i marrim ato lekët?”. Këto janë disa nga bisedat e zbardhura mes tyre, menjëherë pas vrasjes.
Deri tani ka të dhëna se për eliminimin e 26- vjeçarit Jurgen Kurti janë paguar 30 mijë euro. Sakaq, tre prej të dyshuarve si organizatorë të krimit janë vënë në pranga, ndërsa personi që sipas policisë, ka shkrepur armën, vijon të jetë në kërkim.
Burime nga grupi hetimor thanë se ka prova konkrete për tre personat e arrestuar, të cilët dyshohet të jenë përfshirë në vrasjen e 26-vjeçarit Jurgen Kurti, dhe përmes tyre është zbardhur mekanizmi i ngjarjes. Mësohet se ata kanë vëzhguar prej afro 2 javësh Kurtin, duke mësuar të gjitha lëvizjet e tij.
Ata janë identifikuar përmes përgjimeve të kryera nga ana e grupit hetimor, ku në bisedat mes tyre kanë përmendur edhe një shumë prej 30 mijë eurosh, që dyshohet të jetë pagesa për realizimin e vrasjes.
