Kuqezinjtë e Panuccit bien shumë shpejt në Alikante, nga një Spanjë që zbret në fushë me shumë etje për të fituar. Motivimi i lojtarëve shqiptarë për të marrë një rezultat pozitiv nuk arriti të bënte punë përballë gjigadëve të Spanjës. Lojtarët nuk u lidhën si duhet dhe ndoshta formacioni që hodhi në fushë tekniku italian nuk ishte ideali për të përballuar presionin e kësaj sfide. Pjesa e dytë u duk më pozitive për kuqezinjtë, të cilët iu afruan golit dy herë, por kjo ndoshta edhe ngaqë Spanja kishte shënuar tre herë dhe e mendonte ndeshjen e mbyllur. Me një Isco në formën më të mirë dhe me një Spanjë aq të organizuar kjo ishte më e mira që mund të merrnin kuqezinjtë. Me këtë humbje Shqipëria vazhdon të mbajë vendin e tretë pavarësisht fitores së Israelit përballë Lihtenshteinit.
Pjesa e parë mbyllet në disavantazh prej 3 golave për kuqezinjtë e Panuccit. Nuk ishte menduar që pjesa e parë të ishte kaq e dobët nga kombëtarja Shqiptare. E nisin mjaft mirë duke u hedhur në sulm, godasin dhe portën me Grezdën. Por spanjollët marrin në kontroll gjithçka dhe në të 15’ën Rodrigo kthen në gol një top të hedhur në zonë nga Isco, totalisht e përgjumur mbrojtja dhe portieri Berisha. Priteshe një reagim nga formacioni i Panuccit, por që nuk lidhen dot dhe të dalin në sulm rrjedhshëm që të jenë të rrezikshëm. Në minutën e 24’ janë sërish spanjollët që gjejnë golin me anë të madrilenit Isco, i cili shfrytëzon në mënyrë perfekt një vertikalizim në zonë nga Koke dhe mposht me mjaft lehtësi Berishën. Ndërkohë vjen një reagim nga Shqipëria me anë të Llullakut i cili godet nga jashtë zone dhe trondit traversën e mbrojtur nga De Gea. Tre minuta pas golit të dytë vjen edhe i treti për të vulosur rezultatin e pjesës së parë. Këtë herë është Alcantara që mposhtBerishën me një goditje mjaft të bukur me kokë. Në minutën e fundit të ndeshjes vjen një rast i artë për kuqezinjtë, ku Grezda i rrëmben një top Pique në zonë dhe pason për Llullakun i cili nuk arrin të godasë si duhet dhe të dërgojë topin në zonë. Me rezultatin 3-0 mbyllet edhe pjesa e parë, duke shuar çdo shpresë për të marrë një rezultat pozitiv. Të shohim në pjesën e dytë çfarë do të bëjë tekniku italian Panucci për të ndryshuar rrjedhjen e ndeshjes, apo për të mos u ndëshkuar më shumë.
Pjesa e dytë flet për kombëtaren Shqipëtare pasi Panucci bën dy zëvendësime të rëndësishm, hedh në lojë Sadikun dhe Agollin. Por edhe në fillim të kësaj pjese janë sërish spanjollët që kërkojnë më shumë golin duke vënë në vështirësi dy herë Berishën, por që këtë herë është i vëmendshëm. Shqipëria i afrohet golit me Sadikun, por që e ndalon shtylla. Më pas është Latifi që godet në hyrje të zonës, por De Gea është në pozicion dhe pret topin, I cili kthehet tek Sadiku që godet fluturimthi por që përfundon mbi traun e portës. Spanjollët kontrollojnë mjaft mirë rezultatin, duke mos i lejuar kuqezinjtë ti afrohen portës dhe të rrezikojnë. Me rezultatin e vulosur që në pjesën e parë u mbyll edhe ndeshja e 9 e grupit G e vlefshme për eliminatoret Rusi 2018.
Golat:
