Pak javë më parë një zjarr gjatë rikonstruksionit shokoi Parisin dhe mbarë botën duke shkrumbuar katedralen “Notre Dame”. Senati francez ka miratuar një projekt-ligj për rindërtimin e katedrales së “Notre Dame” në Paris. Ligji parashikon rikthimin e katedrales në gjendjen që ishte para se të digjej nga zjarri aksidental.
Projektligji kishte kaluar në dhomën më të ulët të Parlamentit në Francë, por Senati shtoi një klauzolë, sipas të cilës katedralja duhej të rindërtohej sipas stilit origjinal gotik, çka u jep fund në mënyrë përfundimtare hamendësimeve për një rindërtimi të stilit modern.
Rindërtimi i katedrales së djegur është bërë temë debati intensiv javët e fundit. Sugjerimet e paraqitura nga arkitektë dhe dizajnerë përfshinin zëvendësimin e gurit me një piramidë xhami ose një “kullë” prej drite, një kopsht urban me energji diellore apo një pishinë.
Presidenti francez Emmanuel Macron është shprehur i hapur për një rikonstruksion modern të katedrales 800-vjeçare dhe ka bërë thirrje për “një rindërtim krijues”.
Por vota e Senatit tani duket se i ka vënë fre çdo imagjinate moderniste. Vendimi pritet të kënaqë shumicën e francezëve, 54 për qind e të cilëve e duan katedralen të restauruar asnjë “prekje” moderne, kjo sipas një sondazhi të marrë muajin e kaluar.
Projektligji ende nuk mund të konsiderohet ligj, pasi Dhoma e Ulët duhet të bjerë dakord mbi disa ndryshime të bëra nga Senati të hënën, lidhur me ndërprerjet e taksave për donatorët për rindërtimin dhe një zbutje të ligjeve të planifikimit dhe trashëgimisë për të lehtësuar avancimin e punimeve.
Macron ka kërkuar që projekti të përfundojë në pesë vjet, gjë që nuk është mbështetur nga shumë senatorë.
