Normalizimi i marrëdhënieve mes Beogradit dhe Prishtinës është një nga pikat kyçe për integrimin e Kosovës dhe Serbisë në BE.
Sipas kryenegociatores të ekipit serb në BE, Tanja Mishçeviç, negociatat e pranimit nuk janë duke përparuar në shpejtësinë e duhur.
“Disa vende të Ballkanit nuk dëshirojnë të hyjnë në BE ose kanë qëllime të caktuara për të ngadalësuar procesin”, është shprehur ajo.
Edhe McAllister ka theksuar rëndësinë e zgjidhjes së cështjes mes Kosovës dhe Serbisë, i cili ka deklaruar se Serbia duhet të luftojë kundër korrupsionit, të ketë sundim të ligjit, liri të medias dhe të zgjidh çështjen e Kosovës.
Megjithatë, për ligjëruesin e Shkencave Politike, Filip Stojanoviç zgjidhja e problemeve me Kosovën nuk është e mjaftueshme për të hyrë në BE:
“Qytetarët mund të mendojnë se kjo është e mjaftueshme por harrojnë se thelbi është tek reforma dhe ndryshimi në të gjithë vendin. Ne si dhe vendet fqinje jemi të zhytur në korrupsion, me ekonomi të trazuar dhe këto janë gjëra që duhet të ndryshohen . Sundimi i ligjit është në fakt diçka që përshkon nëpër të gjitha segmentet e jetës dhe këto janë problemet më të mëdha. Unë do të thosha se nuk jemi ende sepse nuk ka të bëjë vetëm me kushtet politike”, ka përfunduar Stojanoviç.
Për Kosovën, Bashkimi Evropian është ende larg, sidomos duke pasur parasysh se Kosova nuk është njohur si shtet nga pesë vende anëtare të BE-së. Megjithatë, euro është monedha e Kosovës dhe po ashtu përafrohet me legjislacionin evropian, ndërsa korrupsioni është një nga problemet e saj të mëdha.
