Kërkesa për dekretimin e Sandër Lleshajt drejtuar presidentit Meta ka shkaktuar përplasje mes këtij të fundit dhe kryeministrit Rama.
Çështja krijoi një ngërç politik, teksa të dy palët janë treguar ‘kokëfortë’, madje duke akuzuar njëri-tjetrin për shkelje Kushtetute. Kryeministri Rama po ashtu nuk u kursye, duke thënë në Kuvend se ‘nuk e përballonte dot një president qesharak’.
Sot, në ditën e fundit të Sesionit të Dytë Plenar të Parlamentit Ndërkombëtar për Tolerancën dhe Paqen, i cili po zhvillohet në Tiranë, Meta është kthyer në Kuvend. Ai mbajti një fjalim ku vlerësoi Shqipërinë për paqen e tolerancën fetare, ndërsa nuk ngurroi të thumbojë edhe kryeministrin.
Gjatë fjalës së tij, presidenti dha mesazhin se duhet investuar më shumë për arsimin, sidomos tek të rinjtë shqiptarë, teksa tha se paqja fetare nuk mjafton nëse nuk investohet në kapitalin human.
“Të investohet më shumë në kapitalin human, për arsimin e të rinjve. Ku ka injorancë, ka keqqeverisje”, tha ndër të tjera Meta në mes të Kuvendit.
