Presidenti Ilir Meta ka reaguar sërish sa i përket kthimit të paketës Anti-Shpifje.
Përmes një postimi në Facebook, Meta jep edhe arsyetimin ligjor që arsyeton sipas tij mosdekretimin e kësaj pakete. Kreu i shtetit bën edhe një herë thirrje që të lexohen me kujdes argumentet kushtetuese dhe ligjore të kthimit për rishqyrtim në Kuvend.
Postimi i plotë:
Të dashur qytetarë,
Liria e shprehjes, liria e medias dhe e drejta e informimit, përveç se janë të drejta themelore kushtetuese, janë të lidhura ngushtë me parimin e ndërtimit dhe funksionimit të një shteti demokratik.
Shqipëria dy vitet e fundit ka një përkeqësim të këtyre treguesve, sipas konkluzioneve të organizatave prestigjoze ndërkombëtare të gazetarëve, si dhe të institucioneve ndërkombëtare që monitorojnë respektimin e lirisë së medias.
Ndaj është koha për të reflektuar dhe për të mos ecur me kokëfortësi në rrugën e censurës dhe autoritarizmit, që do të përbënte rrezik për të ardhmen europiane të Shqipërisë.
Edhe njëherë, i ftoj të gjithë të lexojnë me vëmendje argumentat kushtetuese dhe ligjore të kthimit për rishqyrtim në Kuvend të paketës së ashtuquajtur “anti-shpifje”.
