Gazetari Elton Qyno është shprehur se gjyqi ndaj ish-ministrit Saimir Tahiri po zvarritet qëllimisht. I ftuar në studion e “Pa Protokoll”, Qyno tha se kjo që po ndodh me Tahirin është një përpjekje për ta lënë jashtë politikës.
Duke bërë një analizë të kësaj çështje, ai tha se janë tre faktorë të cilat kanë ushtruar presion. Ai i referohet politikës, ndërkombëtarëve dhe medias.
Gazetari, duke pasqyruar çështjen në fjalë, përmendi faktorin ndërkombëtar. Për të, prezenca e tyre është presion për një gjyqtar, për një prokuror, por edhe për të pandehurin.
Po kështu, zgjatja e afateve me 2 apo 3 vite që do të ketë procesi është një kohë e gjatë. Qyno shprehet më tej se kjo kohë shërben për të rilindur figura të tjera në PS.
“Presioni ka ardhur jo vetëm nga politika në këtë çështje, por edhe nga ndërkombëtarët dhe media. Janë tre faktorë që kanë ushtruar presion në këtë çështje. Ne çdo seancë kemi faktorin ndërkombëtar që ndjekin këtë proces gjyqësor.
Nuk është ndonjë gjë jo e ligjshme për të ndjekur një gjyq, por prezenca e tyre është presion për një gjyqtar, për një prokuror, por edhe për të pandehurin.
Nga ana tjetër, shumë ujëra lëvizin nën rrogoz sa i përket politikës shqiptare, ku nëse do të kishim sot një vendim do të ndaheshe shapi nga sheqeri sa i përket ecurisë dhe për ambicien e zotit Tahirit në politikë.
Kjo është një përpjekje për ta lënë mënjanë ose jashtë nga politika. Zgjatja e afateve me 2 apo 3 vite që do të ketë procesi është një kohë e gjatë. Kjo kohë shërben për të rilindur figura të tjera në PS dhe mbajtja e këtij begraundi kriminal që i është adresuar këtij personi, i ka lënë një njollë të madhe”, tha gazetari Qyno.
Ish-ministri i Brendshëm, Saimir Tahiri, reagoi ashpër pas vendimit të Gjykatës së Apelit për të rikthyer çështjen në pikën zero.
Tahiri theksoi se nuk e priste këtë vendim, duke shtuar se rikthimi në pikën zero është padrejtësi.
“Jo, nuk e prisja, është mbas thuajse 3 vitesh. Historia do të merrte një drejtim, cilido qoftë. Rikthimi në pikën zero është padrejtësi”, tha Tahiri.
