Nënkryetari i Lëvizjes Socialiste për Integrim, Luan Rama ka dalë në një konferencë për shtyp, ku ka dhënë detaje për mbledhjen e kryesisë.
Luan Rama e quajti misionin e LSI-së përcaktues për fatet dhe demokracinë në vend, ndërsa shtoi se kryesia ka vendosur që dy nënkryetarët e grupit parlamentar do të jenë Klajda Gjosha dhe Përparim Spahiu, sekretare Nora Malaj, ndërsa zëdhënës i grupit do të jetë Floida Kërpaçi.
“Kryesia u mblodh për të nisur një proces tërësor për rikonstruktimin e të gjitha strukturave dhe nivelet, për t’iu përshtatur më mirë rolit të ri në opozitë duke afruar një alternativë opozitare, qytetare, me një mision të rëndësishëm dhe përcaktues për fatet dhe demokracinë në vend.
Ne do të nisim fazën e riorganizimit tërësor të partisë në të gjithë vendin për të konkretizuar në nivelet e përfaqësimit angazhimet dhe kontributet tona. Merr një rol të rëndësishëm roli i grupit parlamentar për përmbushjen e të gjitha angazhimeve dhe sfidat që ka opozita shqiptare përballë realitetit politik në vend.
Kryesia propozoi dy nënkryetarë të grupit: do të jenë Klajda Gjosha dhe Përparim Spahiu, ndërsa sekretare do të jetë Nora Malaj. Grupi do të ketë zëdhënës të vetin deputeten Floida Kërpaçi”, u shpreh Luan Rama.
