Kreu i Partisë Demokratike, Lulzim Basha po zhvillon një bashkëbisedim me gazetarët, për të sqaruar ngërçin që është krijuar lidhur me zgjedhjen e prokurorit të përkohshëm të përgjithshëm.
Lulzim Basha ka lexuar disa nene të Kushtetutës, duke iu referuar atyre si arsye përse është kundër zgjedhjes së një kryeprokurori të përkohshëm, ndërsa u ka kërkuar gazetarëve që të sqarojnë publikun lidhur me këtë “mjegull” që është krijuar.
Kryedemokrati e quajti situatën aktuale krizë të bllokimit të qëllimshëm të Reformës në Drejtësi.
FJALA E BASHËS:
Sot jo krizë të zgjedhjes së kryeprokurorit, por krizë të bllokimit të qëllimshëm të reformës në drejtësi. Prandaj s’duhet të merren me propozime pazaresh politike në kurriz të kushtetutës.
Dy qëllimet kryesore të Reformës në Drejtësi:
Pastrimi i drejtësi dhe gjyqtarët dhe prokurorët e inkriminuar përmes vettingut (procesi kushtetues i pastrimit të sistemit të drejtësi nga gjyqtarët e paaftë dhe të inkriminuar)
2. Pavarësia e drejtësisë nga politika – krijimi i institucioneve të pavarura nga politika.
Që këto dy parime të ishin të paprekshme nga asnjë politikan, u sanksionuan qëllimisht në Kushtetutë.
Më 22 korrik është ndryshuar më shumë se 1/3 e Kushtetutës. Reformë në drejtësi jashtë kushtetutës nuk ka e nuk mund të ketë.
