Gjykata e Tiranës ka caktuar masën e sigurisë “arrest me burg” për 43-vjeçaren Lubjana Gjecaj, e cila është e dënuar në Itali për terrorizëm. Ajo ka thënë para togave të zeza se ka dashur që të vuajë dënimin në Itali, por nuk është lejuar nga shteti italian.
“Kam djeni për dënimin ndaj meje në Itali. Kam dashur të shkoj për të vuajtur dënimin, por nuk më ka lejuar shteti italian. Do të bëj kërkesë që të vuaj dënimin këtu”, mësohet të ketë thënë ajo.
43-vjeçarja, nënë e 3 fëmijëve, ishte pjesë e një grupi të strukturuar kriminal terrorist. Ky grup i strukturuar kriminal, kryente martesa mes të rinjve dhe i dërgonte ata në Turqi, dhe më pas në Siri për të luftuar për të ashtuquajturin Shteti Islamik.
Një krushqi e lidhur mes familjes së një vajze të re italiane dhe një shqiptari me origjinë nga Laçi në 2014, zbuloi celulën terroriste që rekrutonte luftëtarë për ISIS-in. Pas 8 muajve hetime, në një operacion të gjerë të shtrirë në disa qytete në Itali dhe në Lushnje, 10 persona ranë në pranga. 4 italianë, 1 kanadez dhe 5 shqiptarë. Përveç Lubjana Gjeçajt, pjesë e grupit ishte dhe Dritan Gjeçaj bashkëshorti i 43-vjeçares, Baki Çoku, Aldo Kobuzi dhe Arta Kakabuni.
