Vaksina anti-covid mbërrin më në fund në Shqipëri. E para që u vaksinua ishte shefja e infektivit, Najada Çomo. Menjëherë pas saj, dozën e Pfizer e mori kryeministri, Edi Rama në prani të kamerave.
Gjithashtu, u vaksinaun edhe mjekët Tritan Kalo e Pëllumb Pipero. Kjo është doza e parë e vaksinës kundër koronavirusit, pasi Rama dhe të tjerët, do të duhet të bëjnë dhe dozën e dytë pas 21 ditësh.
Vaksinimi po kryhet në ambientet e brendshme të stadiumit ”Air Albania”. Deri më tani, Shqipëria ka siguruar 975 dozat e para të vaksinës nga një vend i BE-së. Sipas mediave, ishte Austria ishte vendi që i kishte dhuruar dozat e vaksinës për vendin tonë.
Më herët, kryeministri Rama është shprehur se vendi ka siguruar 500 mijë doza të vaksinës nga kompania Pfizer, dhe se të parët që do marrin prodhimin e Pfizer/BioNTech janë mjekët, më pas të moshuarit.
Vaksina do të jetë falas por jo e detyrueshme. Që nga fillimi i pandemisë, Shqipëria regjistron 63,595 të infektuar dhe 1241 viktima.
