Kryeministri i Francës, Edouard Philippe është shprehur se rikthimi i vendit në normalitet do të jetë mjaft i ngadaltë.
Në një konferencë shtypi të dielën e 19 prillit, Philippe tha se Franca e ka kaluar kulmin e pandemisë së koronavirusit. Por pavarësisht kësaj, shtoi ai, vendi nuk do të kthehet shpejt në normalitet, në mungesë të një vaksine dhe trajtimi specifik.
Presidenti Macron e shtyu afatin e izolimit deri në 11 maj. Por kryeministri Philippe deklaroi se kjo datë nuk do të shënojë fundin e mbylljes, por një fazë të re.
Sipas tij, masat pas 11 majit do të shpallen brenda dy javësh dhe do të bazohen në tre parime kryesore: distancimin shoqëror, testimin masiv dhe izolimin e njerëzve që kanë rezultuar pozitivë.
“Jeta jonë nga 11 maji nuk do të jetë si ajo e mëparshme, jo menjëherë, dhe ndoshta jo për një kohë të gjatë. Do të duhet të mësojmë të jetojmë me virusin”, tha ai.
Kryeministri tregoi se shkollat nuk do të rihapen në të gjithë vendin pas 11 majit. Franca është vendi i katërt më i prekur në botë nga COVID-19, pas SHBA-ve, Italisë dhe Spanjës.
Deri më tani Franca ka regjistruar 152,894 raste dhe 19,718 viktima.
