Analisti Mustafa Nano në librin e tij “Si e kam njohur”, rrëfen njohjen me 55 personazhe që i përkasin sferës politike.
I ftuar në emisionin “Historia ime”, Nano shprehet se një nga mënyrat për të folur për Shqipërinë është dhe trajtimi i figurave politike, “që kanë krijuar dramë dhe kanë zgjidhur probleme, ndonjëherë”.
Po ashtu, në librin e tij, ai ka cekur edhe figurën e kryeministrit Edi Rama. Për të cilin thotë se me të ka pasur kontakte të natyrës intelektuale. Ndërsa e cilësoi si “kryeministrin më të trishtuar në botë”.
“Rama, ndër personazhet e librit, është njëri prej atyre që unë e njoh më mirë sepse kam pasur edhe kontakte personale.
Kontaktet e mia personale me Ramën kanë qenë kontaktet e mia më të mira me një politikan sepse kanë qenë të natyrës intelektuale. Kemi shkëmbyer idera politike, nuk kam pasur marrëdhënie siç kanë shumë kolegë të mi me politikanët, që i kanë shumë të afërta.
Nuk i kam pasur asnjëherë të afërta, jemi takuar, kemi biseduar, kemi shkëmbyer ndonjë libër. E këtij niveli, e këtij lloji ka qenë marrëdhënia. Si politikan e kam ndjekur vazhdimisht, fillimisht më ka inspiruar me natyrën e vetë, me kurajon e vetë.
Por me kalimin e kohës, Rama i ka humbur motivimet e mira që ka pasur, nuk ka më motivime, është i zbrazët nga motivimet. Por unë e shoh, ai është edhe i trishtuar, është Kryeministri më i trishtuar në botë”, theksoi Nano.
