Kryeministri i Bregut të Fildishtë, Amadou Gon Coulibaly, ka ndërruar jetë sot pak minuta pasi kishte përfunduar një mbledhje të kabinetit qeveritar.
Presidenti i vendit, Alassane Ouattara, e cilëson kryeministrin si bashkëpunëtorin më të mirë të 30-viteve.
61-vjeçari Coulibaly ishte zgjedhur gjithashtu si kandidati i partisë në pushtet për zgjedhjet presidenciale të tetorit. Ai ishte kthyer së fundmi nga një qëndrim dy-mujor në Francë ku po kryente kontrolle mjekësore.
“Pas ekzaminimeve në spitalin Pitié-Salpêtrière kryeministri do të bëjë disa javë pushim, sipas rekomandimit të doktorëve”, tha qeveria në atë kohë.
Në mesazhin e tij President Ouattara tha: “Përshëndes kujtimin e këtij burri shteti, besnikërinë dhe përkushtimin dhe dashurinë për atdheun”.
