Kryetarja e LSI-së, Monika Kryemadhi ka reaguar sot pas vendimit për procedim penal, për të, kreun e PD-së dhe disa deputetë, pas protestës së opozitës për mosbindjen civile dhe bllokimin e rrugëve.
“E para një herë procedimi i deputetëve të opozitës nga Prokuroria e drogës mos kujtoni se është ndonjë frikë e madhe. Kjo do të thotë që çdo ditë dhe më shumë sistemi i drejtësisë është kapur nga krimi i organizuar. Do të thotë se çdo ditë dhe më shumë kriminelët të cilët vrasin njerëz, plaçkitin shqiptarët, plaçkitin vendin e kanë kthyer Shqipërinë në qendër të drogës.
Ato janë të lirë dhe u njoftohet mandati i arrestit një javë para se të dalin nga Shqipëria, ndërkohë që hallexhinjtë duan të ndërtojnë një çati që po u shembet. Apo të shtrojnë një dritare apo një mur burgosen sepse po bëjnë ndërtim pa leje. Mua nuk më shqetëson fare procedimi penal. E vetmja gjë është se kur të bëjmë atë formularin e dekriminalizimit do ta deklarojmë, që jemi proceduar penalisht nga prokuroria e Edi Ramës.
Por, ajo çka dua të them është që sistemi i drejtësisë është një sistem që vërtet sot është në duart e një grupi njerëzish të cilët do të kenë probleme me drejtësinë e tyre midis njëri tjetrit dhe më pas do të kenë probleme me drejtësinë e shqiptarëve. Sado që të jetë investuar financiarisht por edhe politikisht për ta kapur këtë sistem drejtësie, sistemin e drejtësisë së shqiptarëve nuk e kap dot askush. Është populli ai që vendos drejtësinë më të madhe. Mua nuk më gjykon dot as Edi Rama, as ambasadorët, as Brukseli, as Amerika.
Mua më gjykojnë vetëm shqiptarët dhe më gjykojnë me votë. Dhe gjykimi i tyre për mua është jo vetëm qesharak, por për mua ka vlerë vetëm gjykimi i shqiptarëve. Dhe ajo për të cilën unë sot jam pjesë e politikës, ashtu sikundër kam hyrë 17-vjeç në politikë , për ëndrrat e mia për ta pasur Shqipërinë një vend evropian dhe ashtu do të dal nga politika, atëherë kur Shqipëria të jetë vend evropian. Nuk kërcënon dot Edi Rama, nuk kërcënon dot as Arta Marku, as Fatmir Xhafaj, as policia e drogës, as Policia e Shtetit dhe as Policia e diktaturës. Unë këtu jam! Rrugëve të Tiranës jam! Si të duan, ndash me polici ndash pa polici Monika Kryemadhin e kanë në këmbë! Me çizme dhe pa çizme!”, tha Kryemadhi.
