Kryetarja e LSI-së, Monika Kryemadhi, ka zhvilluar sot një takim me gjimnazistët e Tiranës. Gjatë fjalës së saj, Kryemadhi ka theksuar se një nga problemet e mëdha me të cilat përballet sot vendi është shpopullimi, për të cilën ka akuzuar kryeministrin.
Kryemadhi ka ndarë me të rinjtë faktin që edhe ajo si shumë shqiptarë të tjerë e ka menduar disa herë të largohej nga vendi. Kryetarja e LSI-së komentoi dhe qëndrimet e Ramës dhe sulmet e tij ndaj SPAK-ut, teksa ka thënë se kjo vjen për shkak të frikës që ka ndaj dosjes së inceneratorëve.
“Po t’ju pyesësh të gjithëve nëse doni të largoheni nga Shqipëria, besoj se ju të gjithë do thoni po! Largimin nga Shqipëria edhe unë e kam menduar shumë herë, por këtë gjë e do Edi Rama.
Edi Rama është kryeministri i drogës, korrupsionit, i varfërisë së shqiptarëve, është kryeministri i çdo fatkeqësie që i ka rënë shqiptarëve.
Rinia shqiptare ndjen neveri ndaj politikës dhe sot pamë se si Edi Rama urdhëronte ngritjen e Këshillave Rinor me urdhër politik. Kërcënonte SPAK-un, PS, SKAP, çfarë s’kemi dëgjuar, por shkumëzimi që kishte Rama behet fjalë për dosjen e inceneratorëve.
Fatet e Tiranës për 30 vjet i ka vendosur Edi Rama dhe Erion Veliaj, sepse ata do vendosin taksat. Të rinjtë s’do kenë të drejtë të marrin vendime, sepse çdo gjë është dhënë me koncension”, tha Kryemadhi.
Më tej, kryetarja e LSI-së ka sulmuar dhe ish-aleatin e saj, Lulzim Basha, të cilin e akuzoi se shiti opozitën për interesat e tij personale.
“Luli i Vogël në politikë, por që ishte i madh në shitjen e opozitës, ai shiti interesat e shqiptarëve për përfitimet e tij financiare”, theksoi ajo.
